سکنت الصفنه إبضــميري اوفجّرت ثورة غضب
إبوجه من راد التفرق يغزي ثايات العرب
صحت خل نتحد يهلي ابشيمة ونشکل شعب
ونرجم کل جاهل شيطانه
(***)
إلک يازمن ما طخ راس کلما کثرت علتي
أکابر أظل حد الموت ما تنگص أبد همتي
رجال العرب کلهه اعضاي او کل بنت الشريفه إختي
او چفيتي اتصير الهه الشيــله
(***)
لون سئلتني ام شهيد او خاطبتني اشقدميت
الَولدي يل لحظة إعدامه هلهلتله او ما بچيت
الهل وطن ضحيت بی او منّک آنه اتوقعيت
ابثاره اتطالب ما تنســا
(***)
هوسه بحق الشاعر الراحل ستار صياحي:
دگّت باب حلمي إبليـل تنـشد عن حمـد حمـده
گالت وين اخوي الچان أفخر وگـعد ابسـدّه
گلتلهه حمـد غدرو نذول اللي اغصبـوا مجـده
وستشهد يختي او ودعنا
(***)
لاتبيع ابکل مناضل ارد انصحک یا عميل
حيث لو ثارة الثورة حملک ايصبّح ثجيل
من مجد اهواز تدری اشگال وشصاح السليل
من اول دمک هدرینا
(***)
صور شعر الفکر کلهن وگفن ابخدمة العين
و حرت شنهو اختار منهن لبوفاضل و الحسين
قمّم صاروا للنضال و روح اقرأ الماضي زين
ابوجه الظالم نوگف علمونه
(***)
ابشعري مَـتملگ الأحد حتی لو تنگص رگبتي
او حگي يالمطلوب ليّه ابعگلي ارجعنه او صفنتي
ابصدري شايل صبر بدوي والمثقف يدري قصتي
ما خون الماکل من زاده
(***)
ما خون الکلت زاده او حذر ماخذ واحتياط
او ستر بيته ما اهتکه او سيفه اصيرن بالزماط
بس لون ماعرف قدري ملحي اشيله امن السماط
لن ماشور بي من ذاگه
(***)
طرف مابيه المضيف اوصيه اگلک لا صدر
او ابد لا تتعله فوگ او تحشر ابنفسک حشر
انته لو فاهم تقدرک ناس التعرف القدر
لو تگعد يم عتبت بابه
(***)
ابعتبت الباب اذا تگعد تنجعل صدر المضيف
او شرف کل امکان اگلک بالمکين ايظل شريف
الريش ريش اشما تعلّه وابد مايثگل خفيف
او يطّشر بالريح اتشوفه
(***)
ابگلبک حقد لاتجمع واذا تجمع اخبرک يوز
لن چفک ابيوم الماو لچفوف العمام ايعوز
اوياهم تختلف بالراي جايز بس ابد ميجوز
تصبح منشار اتگص بيهه
(***)
لاتصبح ابد منشار بچفوف العمام اتگص
و لا حية رمل تصبح تدور اعله الفرص تگرص
لگمة زاد خوت الطيب گالو تنجسم بالنص
والياکل وحده ایقص بيهه
(***)
بعگاله يتوج کون چفيّت العرب عالجيل
والدشداشه لبسه اتصير رغماً علی اصحاب الفيل
زي النبي وآل البیت زينه المايعجبه ايشيل
من هاي الگاع اتگلوله
(***)
اوصيه يا بنتی ارد اگلچ واحفظي زين الوصيه
اتحزمي ابچفيتي بويه لو متت لجل القضيه
بالسلف اوگفي او حیی ابهلچ یعرب والتحيه
للما خان ارضچ قدميهه
(***)
اتطول حبيت الليالي او لايمر عيني المنام
حتی افکّر بيهه اظل اشلون اصفيهه العمام
احلول کثره ابّالي اجني او شفت حل الإحترام
تلتچ بالماو ايخليهه
(***)
عجزنه اشکثر ماعدنه الکلام او تعب قاموسه
البشر بالفهم گلناها يُــقدر ماهو بالهوسه
و اذا يملک عگل وادراک إدن بالسلف ناقوسه
لو چان امسمل ملبوسه
(***)
المايهم ابهم عضيده او مايشارک بالجرا
اعليه گلي اشلون ينعد بالوغه احزام اظهرا
يظل کل يذع المتچه او حتی ماينفع ضرا
من الحر تگعد بفيايه
(***)
يقص ابلگمة الخوه حچوها الياکل ابوحده
و بحر خوته جزر تلگا ابد مايطفح ابمده
الراچب مهرة اعناده انصحه ابعگل يتهده
عن لاتعثر ساعة غيظه
(***)
ما تأمن ابفيه تگعد خاف فد لحظه ويطيح
اعليک تالي اتموت حدرا او مو صلب مثل المسيح
اهوايه تلگاها الي مثله الدفنت الخوه او ضريح
خلتهه و بس تحلف بيهه
(***)
الماشرب من شط بوفاضل ماي خوته او لرتوا
للأخوه اشلون يگدر بالسلف يرفع لوا
ابکربلا اولاد حيدر شفتوا من وگفو سوه
اجساد اهل الذل بيدر سووها
(***)
امن الزغر لتعلم ابنک عالتکبر والغرور
والحقد والکره و ايضا بلا منطق يحچي زور
علمه عصر الفهم هاذه و الثقافه التشع نور
و الجاهل أهله ايطردونه
(***)
إمن الزغر لتعلم ابنک عالتفاخر بالجهل
او تحط بيده اسلاح يرمي ابليل بيبان الأهل
قلم إهديله او دگله هاذه مفتاح الأمل
لا لحظه اتعوفه ايبوگونه
(***)
الفتنه ذاکرهه ابکتابه الباري اشد امن القتل
او يا فهيم اگطع حبلهه او بيه لا تفتل فتل
المشه ادّحلب وي اخوته ابهاي أگلک وابختل
مثل الگص چفين ازماطه